Oppdaterte ordbankfiler for programmet ordbanken

[Karl Ove Hufthammer]

Hei, brukarar av programmet Ordbanken!

Ei ny versjon av Norsk ordbank vart offentleggjord i dag, og eg har 
derfor oppdatert ordbankfilene (datagrunnlaget for programmet ordbanken) 
i Subversion-depotet basert på denne. Sjølv om filene først vart 
publiserte i dag, er dei baserte på eit uttrekk frå 1. februar 2022. Den 
førre versjonen var frå oktober 2019. Ut frå ei e-postutveksling eg har 
hatt med Språkbanken (ved Nasjonalbiblioteket) og Språksamlingane (ved 
UiB), verkar det til å ha vore ei misforståing som har ført til at 
Språkbanken ikkje har publisert nokon nye ordbankfiler dei siste åra.

Førebels er endringane berre tilgjengelege via Subversion-depotet 
(svn://svn.savannah.nongnu.org/ordbanken/), men eg vil gje ut ein 
offisiell versjon om ikkje så lenge.

Det har elles blitt gjort *mykje* med ordbankmaterialet sidan 2019. Sjå 
heimesida til Revisjonsprosjektet 
(https://www.uib.no/lle/121561/revisjonsprosjektet-bokm%C3%A5lsordboka-og-nynorskordboka) 
for meir informasjon. Årsmeldinga deira for 2021 er òg interessant 
lesnad: 
https://www.uib.no/sites/w3.uib.no/files/attachments/arsrapport_for_revisjonsprosjektet_2021.pdf

Det er fleire tidsaktuelle nye ord i dei nye ordbankfilene, som 
«munnbind», «andedragsvern», «koronavaksine» og «elsparkesykkel» (men òg 
nokre alderdommelege nye ord, som «møllpose»). Her er ei oversikt over 
kva lemma (grunnord) som er gåtte ut, komne inn eller fått endra 
stavemåte i nynorskfilene:

https://huftis.org/kritikk/ordbanken/endringar-lemma-nn.html

Det er berre eitt lemma som er *markert* til å ha fått endra stavemåte, 
og det er «ablegøyer», som no har grunnforma «ablegøye» (og altså kan 
brukast i eintalsform). Men det er i praksis fleire. Eg ser for eksempel 
at «besserwissar» har gått ut og «besserwisser» har komme inn. Det er jo 
same ord, men med ny stavemåte og ny lemma-ID (talkode som identifiserer 
lemmaet).

Det er òg mange endringar i bøyinga av orda:
http://huftis.org/kritikk/ordbanken/endringar-fullform-nn.html

Det meste ser ut til å vera fjerning av «falske» adjektivbøyingar, som 
«himmelfalnaste». (Men eg synest dei har vore litt overivrige og fjerna 
fleire gyldige adjektivbøyingar.)

Her er tilsvarande oversikter for bokmål:
http://huftis.org/kritikk/ordbanken/endringar-lemma-nb.html
http://huftis.org/kritikk/ordbanken/endringar-fullform-nb.html

--
Karl Ove Hufthammer